ألف ألف مبروك
ما شاء الله تبارك الله
الله يعطيك خيرها ويكفيك شرها
والله يهنيك فيها ويكفيك شر العين
آمين
السلام عليكم ورحمة الله وبركاته
يسعدني ويشرفني الإنضمام لهذا المنتدى الجميل اللي كنت اتابعه حتي قبل اشتري اكورد بحكم عشقي لها
طبعا هذي أول مشاركه لي وراح اوريكم تقرير عن معشوقتي الاكورد اللي تحققت أمنيتي وطلعتها الحمد لله
طبعا الاكورد هي سيارتي الرابعه بعد كابرس 2001 واوبترا 2008 والنترا 2014
طبعا تم استلام السياره يوم الأحد 27 نوفمبر 2013 قبل شهر تقريبا
أول مانزلت القبو شفت هالمنظر الزين اللي يشرح الصدر
ثم مشيت شوي واطالع يسار والقى مويتري يالبى قلبه
طبعا اخذت فل جلد وتم اختيار اللون الأبيض لأني أشوفه الأفضل على الأكورد وحاولت ابتعد عن الغامق عشان اجوائنا الحلوه
وهذي صوره أخرى من الأمام
طبعا نشب لي الهندي قاعد يمسح السياره يبي بخشيش والله يستاهل بس ماكان معي كاش في جيبي
اخذت السياره بعدالمغرب تقريبا وطلعت من خريص وكانت يدي على قلبي من زحمة خريص ذاك اليوم
وخصوصا بعد المسافه لبيتنا لأني ساكن في غرب الرياض
كان أصعب مشوار صراحه
وهذي صوره لشاشة النفقيشن كنت احوس عند نادي الهلال قاعد اجربه
ثالث يوم تقريبا قررت اكيس المراتب والارضيه والبيبان قبل لاتنحاس
ودلني واحد على محل يقال له المغربي على طريق الملك فهد ويقول سعره غالي بس شغله حلوو
وطبعا الرجال ثقه توكلت على الله وقلت خلاص بكره نروح
وصلت بعد صلاة العصر للمحل
طبعا قال السعر 650 ريال مثل ماقال خويي تقريبا شامل تكييس البيبان والارضيه والشنطه والمراتب والتكايه
وحاولت فيه ينقص مانفع
وارتحت له شوي بحكم اغلب المواتر فيه لكسز وفوق
توكلنا على الله وبدا يفك الديكور والمراتب وانا يدي على قلبي
فجاه سهيت ورجعت لقيته شايل الديكور كامل التكايه والتخشيبه اللي جنب القير ماعاد فيه شيء
خفت وطبيت في خويي قلت اقنعني انهم شالوا كل هذا بدون مالعبوا في الديكور
قال اذا خلصوا وصار مخربين شيء لك ماتبي اعرف شغلهم
وقعدت على اعصابي من العصر لين بعد العشاء بدوا يركبون الديكور
والحمد لله كان الديكور سليم
بس كان عيبهم الاهمال شوي يعني تلقاه حاط المقص عند الشاشه والسكاريب فوق الديكور
طبعا زبدت لهم والحمد لله الموتر ماتأثر أبد
وهذي الصوره بعد نهاية الشغل
تقييمي للشغل 8 من 10
ثاني يوم رحت لمزرعة واحد من العيال
وبعد ماطلعت كان الطريق جديد وكله قار وصلت الرياض تفاجات بالقار لعب في البدي
بس ماكان كثير ومع ذلك ضاق صدري كثير بحكم الموتر لسه ماله كم يوم
واحترت وش اسوي بعد حوسه في النت شفت الاغلب يمدح منتج bug and tar من مقوايرز
رحت لساكو وللاسف مالقيته وحصلت منتج نفسه بس من شركة armorall
توكلت على الله وخذته وكان على شكل مناديل تمسح به المنطقه المتضرره
وهذي صورته
الحمد لله استخدمته ونتايجه روعه ولاياثر على اللمعه بشرط تغسل السياره على طول
بعدها قررت اظلل السياره واركب حمايه
وترددت بين لومار وثري ام
وكان في خصم حلو في لومار لموظفي سامبا 35 %
وقررت اروح للومار بحكم سعره المعقول والخصم
خصوصا سعر ثري ام كان مبالغ فيه التضليل بـ 2400 فقط
طبعا رحت للومار واخترت 02 جميع القزاز ماعدا الأماميه شفافه
عشان ارسال الراديو والنافقيشن والجوال
سعر التضليل كان 1600
وبعد الخصم طلع 1040 ريال
أما الحمايه للوجهيه كان عليها خصم 20%
وسعرها 1800
بعد الخصم طلعت 1400
وطلعت علي الشغله كلها بـ 2440 ريال
مع ضمان لحماية الوجهيه 5 سنوات
وللتضليل 10 سنوات
وهذي صور للسياره بعد التظليل
وكان شغلهم رهيب صراحه
واعطيهم 9 من 10
طبعا هذي صوره للداخليه يقال لي ابي اخرج هههه
طبعا السياره شهادتي مجروحه فيها وخذيتها با إقتناع تام
والحمد لله اللي كتب لي اشتريها صراحه
السياره لحد الآن ماشيه 2400
ومميزاتها ماشاء الله وش تعد وش تخلي
وبالنسبه للعيوب التنسيم مثل ماهو معروف من دريشة السائق
مع إني أشوفه مو ذاك التنسيم
والعزل الأرضي ليس ممتاز
رغم كل هذا لم ولن أتندم على إني اشتريت أكورد
واللي عنده أي استفسار أنا حاضر
في الأخير عندي سؤال بخصوص الفحمات سمعت أنها تخلص سريع
وأن فيه مشكله بالفحمات من موديل 2008
وكم عمرها الافتراضي في حالة الاستخدام المعتدل للفرامل ؟؟
وشكراً
التعديل الأخير تم بواسطة عاشق_الاكورد ; 21-11-2013 الساعة 12:15 AM
ألف ألف مبروك
ما شاء الله تبارك الله
الله يعطيك خيرها ويكفيك شرها
والله يهنيك فيها ويكفيك شر العين
آمين
ماشاء الله
الله يعطيك خيرها ويكفيك شرها
وبالنسبة للفحمات كانت المشكلة موجودة في الأكورد من 2003 الى 2010 بسبب خلل في الكليبرات
لكن من 2011 وانت طالع مافيها ذي المشكلة
أنا سيارتي اكورد 2012 لها معي سنة واربع شهور وماشي عليها 71 الف والفحمات باقي ماخلصت رغم اني من النوع اللي يدعس على الفرامل بقوة
ماشاء الله تبارك الله الله يعطيك خيرها و يكفيك شرها و نعم الاختيار و تتهنى فيها يا رب بالنسبة للاقمشة اتوقع في صيانة ال 20 تتغير مع اني ماشي اكثر من 20 ولا غيرت اقمشة خخخ و اختيار موفق للون السيارة و عندي استفسار بسيط كيف اضاءة نور الهالوجين في الخط المظلم هل هي مرتفعة او منخفضة و هل تكشف الخط تمام ولا لا
ياشباب بسألكم عن الباب
أحس الباب فيه ثقل
يعني لازم تسحبه بقوه شوي لين جيت تصكه
هل المشكله عندي ولا عند الكل ؟
مشكور على الافادة ايه الحين اكدت لي ان نور الاصطبات من شركة هوندا منخفض و حله لازم ينرفع بس اذا رفعته راح تضعف كثافة الضوء و هذا شيء مضايقني شوي بالنسبة لثقل الباب هذا من جودته و اجهزة التحكم اللي داخل الباب و هذا شيء طبيعي و لاحظ الفرق بين باب السايق و الراكب و الابواب الخلفية اثقل باب باب السايق بعدين الراكب بعدين الابواب الخلفية لان مافيها اجهزة تحكم داخلها مثل باب السايق ان شاء الله اكون افدتك
الف مبروك على السياره ويارب يعطيك خيرها ويكفيك شرها
استفسار لاهنت هل الcd حق السياره يشغل dvd سواء افلام او تراكاات ؟؟ تحياتي لك
ماشاء الله تبارك الله الله يعطيك خيرها ويكفيك شرها وقبالي ان شاء الله
وللعلوميه ترا فيه خصومات على شركات التضليل والحمايه ماحد يدري عنها توصل 45%
مواقع النشر (المفضلة)